Cynorthwywyr Nyrsio mewn Amgylchedd Milfeddygol

Cynnwys y Rhaglen Ddysgu

Bydd darpariaeth y Rhaglen Ddysgu yn cynnwys tair elfen orfodol:

• Cymwysterau
• Sgiliau Hanfodol
• Hyfforddiant yn y gwaith / i ffwrdd o'r gwaith

Yr isafswm gwerth credyd sy'n ofynnol ar gyfer Llwybr Lefel 2 Cynorthwywyr Nyrsio mewn

Amgylchedd Milfeddygol (gan gynnwys cymwysterau a Sgiliau Hanfodol) yw: 71 credyd

Credydau isafswm yw'r gwerthoedd credyd a nodir yn y ddogfen hon. Fodd bynnag, efallai y bydd ystod o gredydau ar gael sy'n uwch na'r isafswm hwn, yn dibynnu ar y cymhwyster ac ar yr unedau/y llwybrau dewisol a ddewisir yn unol â chanllawiau'r sefydliad dyfarnu perthnasol.

HYD

Lefel 2: Isafswm o 12 mis (hyblyg)

Gofynion mynediad

Lefel 2: Cynorthwywyr Nyrsio mewn Amgylchedd Milfeddygol

Nid oes unrhyw ofynion mynediad penodol i gael eich derbyn i Brentisiaeth Sylfaen Lefel 2 ar gyfer Cynorthwywyr Nyrsio mewn Amgylchedd Milfeddygol. Fodd bynnag, mae'r diwydiant yn argymell yn fawr y dylid bodloni'r gofynion mynediad sylfaenol a ganlyn:

• 3 TGAU gradd D (neu 3) o leiaf, gan gynnwys Saesneg, Mathemateg a Gwyddoniaeth neu gymwysterau cyfatebol

Yn ogystal â hyn, ceir cymwysterau neu brofiad a fydd o gymorth i ddysgwyr ddeall y sector cyn cychwyn:

• Profiad o wirfoddoli mewn amgylchedd gofal anifeiliaid milfeddygol a reoleiddir, neu amgylchedd arall priodol.
• Wedi gweithio yn y diwydiant yn y gorffennol, neu'n gweithio ynddo ar hyn o bryd
• Diploma Lefel 1 mewn Gofal Anifeiliaid Seiliedig ar Waith
• Tystysgrif Lefel 1 mewn Gofal Anifeiliaid Seiliedig ar Waith
• Dyfarniad Lefel 1 mewn Gofal Anifeiliaid Seiliedig ar Waith
• NVQ Lefel 1 mewn Gofal Anifeiliaid
• Dyfarniad Lefel 1 mewn Sgiliau Gofal Anifeiliaid
• Dyfarniad Lefel 1 mewn Sgiliau Anifeiliaid Bach Ymarferol
• Tystysgrif Lefel 1 mewn Sgiliau Anifeiliaid Bach Ymarferol

Efallai y bydd dysgwyr sydd wedi cwblhau Bagloriaeth Cymru wedi cwblhau unedau neu gyrsiau byr a fydd yn cynnwys gwybodaeth danategol tuag at y Brentisiaeth Sylfaen. Bydd hyn yn cael ei asesu yn ystod asesiad cychwynnol, gan ganiatáu Cydnabyddiaeth o Ddysgu Blaenorol (RPL) lle bo'n briodol.

Mae cyfleoedd i gwblhau'r Brentisiaeth Sylfaen Cynorthwywyr Nyrsio mewn Amgylchedd Milfeddygol hefyd i ddysgwyr sy'n oedolion a chanddynt brofiad yn y diwydiant gofal milfeddygol, neu sy'n ystyried newid gyrfa.

Rhaglen(ni) dd/dysgu'r llwybr prentisiaeth

Lefel 2: Cynorthwywyr Nyrsio mewn Amgylchedd Milfeddygol

Lefel 2: Cynorthwywyr Nyrsio mewn Amgylchedd Milfeddygol Cymwysterau

Mae'n rhaid i'r cyfranogwyr ennill un o'r cymwysterau cyfun a ganlyn:

Edrychwch ar Atodiad 1 i weld y berthynas rhwng yr unedau cymhwysedd a gwybodaeth o fewn y cymwysterau cyfun.

Sgiliau Hanfodol Cymru (ESW)

Mae WEST (Pecyn Cymorth Sgiliau Hanfodol Cymru) yn orfodol ac efallai y bydd darparwyr hyfforddiant yn gallu creu eu cwestiynau sector-benodol eu hunain drwy ddefnyddio canllawiau a ddarperir gan Lywodraeth Cymru.

https://www.tribalgroup.com/software-and-services/student-information-systems/wales-essential-skills-toolkit

Hyfforddi yn y gwaith/i ffwrdd o'r gwaith

Gan fod hyd y Brentisiaeth Sylfaen yn hyblyg (isafswm o 12 mis), bydd cyfanswm yr oriau dysgu, sy'n cynnwys hyfforddiant yn y gwaith ac i ffwrdd o'r gwaith, hefyd yn amrywio. Yn seiliedig ar oriau gwaith amser llawn blynyddol, bydd hyn yn golygu 1615 o oriau am 12 mis, pro rata ar gyfer unrhyw gyfnod arall.

Cymysgedd addas/hyblyg - argymhellir isafswm o oddeutu 20% i ffwrdd o'r gwaith. Yn dibynnu ar hyd y brentisiaeth, bydd hyn yn golygu 323 o oriau o hyfforddiant i ffwrdd o'r gwaith bob blwyddyn.

Gall yr oriau hyn amrywio yn ôl profiad blaenorol a chyrhaeddiad y prentis, a'r amser a gymerir i gwblhau'r rhaglen brentisiaeth.

Hyfforddi yn y gwaith / i ffwrdd o'r gwaith

Manylion y Cymhwyster yn y Gwaith/i Ffwrdd o'r Gwaith (Isafswm Credydau ac Oriau)

53 credyd/530 o oriau TQT am Ddiploma Lefel 2 City & Guilds ar gyfer Cynorthwywyr Gofal Milfeddygol

neu 57 credyd/570 o oriau TQT ar gyfer Diploma Lefel 2 CQ ar gyfer Cynorthwywyr Nyrsio Milfeddygol

Manylion Sgiliau Hanfodol yn y Gwaith/i Ffwrdd o'r Gwaith (Isafswm Credydau ac Oriau)

• 6 chredyd/60 o oriau TQT ar gyfer Lefel 1 Cyfathrebu Sgiliau Hanfodol Cymru
• 6 credyd/60 o oriau TQT ar gyfer Lefel 1 Cymhwyso Rhif Sgiliau Hanfodol Cymru
• 6 chredyd/60 o oriau TQT ar gyfer Lefel 1 Llythrennedd Digidol Sgiliau Hanfodol Cymru

Gofynion eraill ychwanegol

Lefel 2: Cynorthwywyr Nyrsio mewn Amgylchedd Milfeddygol
Dylid annog dysgwyr i ddilyn cyrsiau ychwanegol, fel tystysgrifau mewn:

• Cymorth Cyntaf Brys (cwrs undydd wedi'i gymeradwyo gan yr Awdurdod Gweithredol Iechyd a Diogelwch HSE)
• Iechyd Meddwl

Rolau swydd

Cynorthwyydd Gofal Milfeddygol/Cynorthwyydd Nyrsio Anifeiliaid

Mae cynorthwywyr nyrsio mewn amgylchedd milfeddygol yn helpu i ofalu am anifeiliaid o dan gyfarwyddyd staff milfeddygol cymwysedig. Mae'r gwaith yn cynnwys rhoi gofal milfeddygol sylfaenol, gan gynnwys trafod anifeiliaid, cynnal eu llety, darparu bwyd a dŵr a chynorthwyo gyda thriniaethau milfeddygol

Dilyniant

Lefel 2: Cynorthwywyr Nyrsio mewn Amgylchedd Milfeddygol

Ar ôl cwblhau'r Brentisiaeth Sylfaen Lefel 2, efallai y bydd Prentisiaid yn gallu symud ymlaen i fod yn fyfyriwr nyrsio milfeddygol, yn amodol ar fodloni'r gofynion cofrestru a osodir gan Goleg Brenhinol y Milfeddygon ar gyfer Myfyrwyr Nyrsio Milfeddygol. Mae'n bosibl y ceir cyfle i symud ymlaen i'r canlynol:

• Diploma Lefel 3 mewn Nyrsio Milfeddygol - Ymarfer Anifeiliaid Bach
• Diploma Lefel 3 mewn Nyrsio Milfeddygol (Anifeiliaid Anwes)
• Diploma Lefel 3 mewn Nyrsio Milfeddygol - Ymarfer Ceffylau
• Diploma Lefel 3 mewn Nyrsio Milfeddygol (Ceffylau)
• Prentisiaeth mewn Nyrsio Milfeddygol
• Prentisiaeth mewn Gofal Anifeiliaid
• Diploma Lefel 3 mewn Gofal Anifeiliaid.

Ar gyfer prentisiaid sy'n dymuno parhau i ddatblygu sgiliau a chymwysterau y tu hwnt i Lefel 2, mae cyfleoedd ar gael i symud ymlaen ymhellach i gymwysterau Lefel 3 ac yna i Addysg Uwch drwy ddilyn Gradd Sylfaen/Gradd.

Efallai y bydd angen gofynion mynediad pellach ar gyfer rhai o'r cyfleoedd uchod, fel Sgiliau Hanfodol neu Weithredol Lefel 2 (Cyfathrebu a Chymhwyso Rhif).

Am ragor o wybodaeth, edrychwch ar Brentisiaeth Lefel 3 mewn Nyrsio Milfeddygol neu fframwaith/llwybr/cymhwyster Lefel 3 o'ch dewis fewn y diwydiant.

Ceir rhagor o wybodaeth am yrfaoedd yn y diwydiant gweithgarwch milfeddygol ar wefan y BVNA www.bvna.org.uk

Cydraddoldeb ac Amrywiaeth

Mae'n bwysig bod Llwybrau prentisiaeth yn gynhwysol ac yn gallu arddangos dull gweithredol o nodi a chael gwared â ffactorau sy'n atal mynediad a dilyniant. Dylai llwybrau hyrwyddo cyfle cyfartal rhwng unigolion a chanddynt nodweddion gwarchodedig a'r rhai nad oes ganddynt y nodweddion hynny, fel y nodir yn Neddf Cydraddoldeb 2010.

Y nodweddion gwarchodedig a nodwyd yn y Ddeddf Cydraddoldeb yw oedran, anabledd, ailbennu rhywedd, hil, crefydd neu gred, rhyw, cyfeiriadedd rhywiol, Beichiogrwydd a mamolaeth. Mae priodas a phartneriaeth sifil hefyd wedi'u cynnwys, ond dim ond yng nghyswllt y gofyniad i gael gwared â gwahaniaethu mewn cyflogaeth.

Mae'n RHAID i ddarparwyr hyfforddiant a chyflogwyr hefyd gydymffurfio â'r ddyletswydd arall o dan Ddeddf Cydraddoldeb 2010 i sicrhau na wahaniaethir yn erbyn ymgeiswyr yn nhermau mynediad i'r diwydiant ar sail y naw o nodweddion gwarchodedig hynny.

Cynorthwywyr Nyrsio mewn Amgylchedd Milfeddygol

Mae'n anodd rhoi ystadegau ar gyfer prentisiaid ar y llwybr Cynorthwywyr Nyrsio mewn Amgylchedd Milfeddygol am eu bod yn croesi rhwng y diwydiant Nyrsio Milfeddygol a'r diwydiant Gofal Anifeiliaid.

Fodd bynnag, yr hyn sy'n amlwg o'r ddau ddiwydiant yw mai menywod sy'n gweithio ynddynt yn bennaf, gyda 67% yn y diwydiant Gofal Anifeiliaid a thros 96% yn y diwydiant Nyrsio Milfeddygol, sydd yn sylweddol uwch na'r ganran o fenywod sy'n gweithio ym marchnad lafur y DU (47%), yn ogystal â chyfartaledd y sector tir lle mae 32% o fenywod (29% yw cyfartaledd Cymru)

Er nad yw'r diwydiant yn atal dynion rhag gweithio yn y sector, awgrymir bod y diffyg cydbwysedd yn deillio o hen ganfyddiad mai diwydiant y mae menywod yn gweithio ynddo yn bennaf yw gofal anifeiliaid, er bod dynion yn cyflawni llawer o rolau yn y ddau ddiwydiant.

Ceir ystod o rolau ymarferol i bobl o bob oedran a gallu, ynghyd ag angen cynyddol am reolwyr, technegwyr ac arbenigwyr medrus.

Mae cyflogwyr yn chwilio am weithwyr sy'n arddangos brwdfrydedd, a chanddynt sgiliau cyflogadwyedd sylfaenol fel y gallu i weithio mewn tîm, cyrraedd yn brydlon a sgiliau cyfathrebu.

Nid oes unrhyw rwystrau gwirioneddol sy'n atal pobl rhag cael eu recriwtio i'r diwydiant, ond mae'n bosibl y ceir rhai cyfyngiadau corfforol yn rhannau o rôl y cynorthwyydd nyrsio, yn enwedig wrth drafod a gweithio gydag anifeiliaid. Ni ddylai hyn gau unrhyw un allan, oherwydd gallai cyfleoedd fodoli i bobl ag anabledd corfforol weithio yn rhan arall o'r diwydiant.

Mae'n ofynnol i ddarparwyr hyfforddiant a chyflogwyr sicrhau na cheir unrhyw achosion o wahaniaethu mewn modd annheg.

Ystyrir bod prentisiaethau yn llwybr pwysig i hyrwyddo ac annog amrywiaeth fwy o unigolion i ymuno â'r diwydiant.

Penderfyniadau a gwaith pellach

Ysgrifennwyd yr unedau o fewn y cymwysterau cymhwysedd  mewn cydweithrediad â sefydliadau dyfarnu partner, i sicrhau eu bod yn rhydd rhag rhagfarn, yn hygyrch i bob prentis, ac yn berthnasol i ystod eang o rolau a busnesau yn y byd Ceffylau.

Mae Lantra yn gweithio gyda'r diwydiant gofal anifeiliaid a'r diwydiant gweithgarwch milfeddygol i hyrwyddo'r angen am reolwyr, technegwyr ac arbenigwyr medrus. Mae hyn yn rhoi ystyriaeth i'r angen i gynyddu amrywiaeth o fewn y diwydiant. Mae'r gweithgareddau'n cynnwys:

Marchnata a chyfathrebu i dynnu sylw at y cyfleoedd ymhlith ystod eang o yrfaoedd ac i grwpiau targed.

Mae'r diwydiant hefyd yn teimlo y gallai fod angen cymryd mwy o gamau ar y cyd â'r proffesiwn milfeddygol i ymgorffori'r rôl hon ymhlith y staff mewn clinig neu loches, a thrwy gynnig gwerth pellach i'r rôl hon, a helpu unrhyw un sy'n chwilio am brofiad gwaith i ddeall y gwaith o fewn practis milfeddygol.

Cyfrifoldebau a hawliau cyflogaeth (CHC)

Nid yw Cyfrifoldebau a Hawliau Cyflogaeth (CHC) yn orfodol mwyach.  Ond argymhellir bod pob prentis (yn enwedig y grŵp 16-18 oed) yn derbyn rhaglen sefydlu yn y cwmni.

Dylid cynnal CHC yn ystod y rhaglen sefydlu, edrych arno eto yn rheolaidd a'i gofnodi.

Cyfrifoldebau

Cyfrifoldeb Darparydd yr Hyfforddiant/y Cyflogwr yw sicrhau bod gofynion y Llwybr hwn yn cael eu cyflawni'n unol â Chanllawiau Prentisiaethau Llywodraeth Cymru/Medr.

Gellir cael rhagor o wybodaeth gan: Medr

Diwygiadau dogfennau